O prezo do alugueiro na provincia de Pontevedra disparouse no terceiro trimestre do ano un 7,3% respecto ao mesmo trimestre de 2023, segundo os datos do Índice Inmobiliario Fotocasa. Este mesmo dato, respecto á capital da provincia, sitúase nunha subida do 3,3%. Con todo, as cifras son totalmente opostas desde o punto de vista da variación trimestral, pois os prezos do alugueiro na provincia baixaron un 7,9% respecto ao segundo trimestre do ano (abril, maio e xuño) e un 7,2% en Pontevedra capital. Na provincia o prezo sitúase en setembro en 9,82 €/m2, mentres que na cidade de Pontevedra sitúase en 8,17 €/m2.

A media tanto en Galicia como en España segue a mesma tendencia que reflicten estes datos, onde o custo do arrendamento caeu un 4,9% na variación trimestral pero subiu un 10,7% na interanual en Galicia, mentres que en España produciuse un descenso do 5,3% no terceiro trimestre respecto ao segundo, pero sobe un 7,4% no último ano, segundo estes mesmos datos. A peche de setembro o prezo do alugueiro situouse en 9,14 €/m2 en Galicia, mentres que en España estaba en 11.98 €/m2. 

Comparando as provincias, a provincia de Pontevedra é a que rexistra un maior descenso na variación trimestral do prezo do aluguer, cun 7,9%, fronte a Ourense (6,7%), A Coruña (-5,4%) e Lugo (-0,8%). En canto ás cidades, o maior prezo atópase en Sanxenxo, co metro cadrado a 16,19 euros ao mes. Séguelle A Coruña capital (11,45), Baiona e Vigo rozando os dez euros, Ribeira (9,81), Santiago (9,70) e Nigrán, con 9,55 euros ao mes. No extremo oposto están Boiro (5,86), Monforte (6,54), Narón (6,67) e Ourense capital (6,89).

Fonte.- Diario de Pontevedra