O mercado inmobiliario de luxo en Grecia experimentou un notable crecemento en 2024, cun aumento do 14,2% no volume de transaccións, que acadaron os 500 millóns de euros, segundo Sotheby’s International Realty. Este incremento segue a tendencia positiva xa rexistrada en 2023, cando o sector medrou un 6,5% con respecto ao ano anterior. As previsións para 2025 son igualmente optimistas, impulsadas polo crecente interese en propiedades exclusivas. O director xeral da axencia en Grecia, Savvas Savvaidis, destacou que os compradores amosaron unha maior predisposición a adquirir vivendas de alto nivel, o que favoreceu un incremento significativo no volume de vendas.

Os destinos con maior demanda en 2024 foron a Riviera de Atenas e Corfú, ambos cun aumento do 15,6%, seguidos polo centro de Atenas (8,1%), Creta (5,9%) e Lefkada (5,2%). Pola contra, Mykonos sufriu unha caída do 17,6% en comparación con 2023. Tamén se observaron descensos en Paros (-9,1%) e Kea (-6,5%). A cidade de Atenas destacou especialmente, cunha suba da demanda do 130% no norte, do 87,2% na súa zona costeira e do 35,7% no centro. Ademais, por primeira vez, os compradores gregos situáronse como os principais investidores neste segmento, representando o 16,2% da demanda total, por diante de estadounidenses, británicos, franceses e alemáns.

Fonte.- Idealista