Ao longo de 2024 os prezos da vivenda en Ferrol medraron arredor dun 6 %, e durante o primeiro trimestre de 2025 continuou esta tendencia, cun incremento do 3,83 %, pasando de 1.045 a 1.085 euros por metro cadrado, segundo datos de Idealista, Fotocasa e Trovimap.

As cifras poden variar segundo o portal, xa que cada un presenta diferentes metodoloxías e ofertas dispoñibles. Idealista adoita ofrecer prezos máis baixos e estables, mentres que Fotocasa amosa maiores oscilacións e prezos máis altos. Trovimap sitúase nun punto intermedio entre ambos. Este último permite observar evolucións máis detalladas dentro do mes, como a lixeira subida a mediados de marzo, cando os prezos pasaron de 1.057 a 1.062 euros, antes de baixar ata os 1.052 a finais do mes.

En canto aos barrios, A Magdalena é o máis caro segundo Fotocasa, con 1.333 euros por metro cadrado, seguido da praza de España, Canido e Ferrol Vello. Idealista ofrece unha visión máis limitada do centro urbano e presenta cifras distintas, como os 1.088 euros en Ultramar, que Fotocasa eleva a 1.154. Caranza mantense como a zona máis económica segundo Idealista, mentres que Fotocasa sitúa a Fajardo nese posto. Ademais, elementos como o garaxe, o ascensor ou o feito de estar amoblado poden incrementar notablemente o valor dun inmoble, sendo o primeiro o factor que máis encarece o prezo por metro cadrado.

Fonte.- Diario de Ferrol