O Goberno sacou a consulta pública o Plan Estatal de Vivenda 2026-2030, o primeiro baixo a Lei de Vivenda de 2023. O programa inclúe a ampliación do Bono Alugueiro Mozo, que medrará de 250 a 300 euros ao mes (200 no caso de cuartos) e poderá solicitarse ata catro anos en total. Tamén se duplican os límites para acceder á axuda: 1.000 euros por piso ou 600 por habitación, con reducións específicas en concellos de menos de 10.000 habitantes. Ademais, o plan introduce apoios á compra de vivendas en municipios pequenos (ata 15.000 €) e descontos de ata 28.800 € para quen opte a vivenda protexida en réxime de alugueiro con opción a compra.

O texto recoñece un déficit superior ás 400.000 vivendas en España, segundo o Banco de España, e subliña que a mocidade é a máis prexudicada: só o 14,6% das persoas menores de 30 anos están emancipadas, fronte ao 32% da media europea. Co prezo medio da vivenda situado en 1.906 €/m², un 8% máis que en 2024, indícase que as familias destinan máis do 35% da súa renda á vivenda, chegando un 38,6% a soportar cargas superiores ao 40%. O Executivo insiste en que o plan marca un cambio de paradigma ao integrar a vivenda como o quinto piar do Estado do benestar.