O Instituto Nacional de Estatística (INE) contabilizou entre abril e xuño 4.133 execucións hipotecarias sobre vivendas, un 20,5% máis que no trimestre anterior e un 27,8% máis en termos interanuais. Delas, 2.902 afectaron a vivendas habituais, que supoñen o 70% do total, e 1.231 a segundas residencias. O incremento sitúa os datos en niveis que non se vían desde finais de 2022 e evidencia o impacto do encarecemento dos tipos de xuro e dos baixos salarios.

O informe detalla que a maioría destes procesos se concentran en hipotecas asinadas entre 2005 e 2008, aínda baixo a influencia da burbulla inmobiliaria. Andalucía (948), Cataluña (820) e a Comunidade Valenciana (782) foron as rexións máis afectadas, mentres que A Rioxa, Navarra e Cantabria rexistraron as cifras máis baixas. Desde a Plataforma de Afectados pola Hipoteca denuncian que, ademais da presión financeira, a banca busca aproveitar a escalada de prezos para facerse coas vivendas.