Durante o segundo trimestre de 2025, os xulgados galegos recibiron quince demandas por ocupación ilegal de vivendas en casos onde os propietarios eran particulares, entidades públicas con vivenda social ou organizacións sen ánimo de lucro. Esta cifra representa unha redución do 37,5 % respecto ao mesmo período de 2024. Galicia sitúase así por baixo da media estatal, con 0,6 procedementos por cada 100.000 habitantes fronte a un punto por cada 100.000 no conxunto de España. No mesmo período, tamén diminuíron os lanzamentos en Galicia, con 320 rexistrados (un 12,8 % menos que o ano anterior), dos cales a maioría, o 85,3 %, estiveron relacionados con impagos de alugueiro, mentres que os procedentes de execucións hipotecarias caeron máis da metade.

Pola súa banda, os xulgados do Mercantil da comunidade experimentaron un notable incremento nos concursos de acredores, con 814 casos entre abril e xuño, o que supón un aumento do 27 % respecto de 2024. Este crecemento débese, sobre todo, ao maior número de procedementos iniciados por persoas físicas sen actividade empresarial, que xa representan a gran maioría dos casos. A pesar deste ascenso, Galicia mantense por baixo da media estatal en número de concursos por habitante. O Tribunal Superior de Xustiza de Galicia atribúe esta evolución ás modificacións introducidas pola Lei Orgánica 7/2022, que trasladou aos xulgados do Mercantil a competencia sobre os concursos de persoas naturais non empresarias, permitindo así unha análise máis precisa segundo o tipo de debedor.

Fonte.- Galicia Confidencial