A conselleira de Vivenda e Planificación de Infraestruturas, María M. Allegue, vén de asinar hoxe co alcalde de Valdoviño, Alberto González Fernández, o convenio enmarcado no Programa de oferta de solo de titularidade das entidades locais para a construción de vivenda protexida neste municipio. Na sinatura do convenio tamén estivo a xefa territorial da Consellería na Coruña, Begoña Freire.

A través deste convenio, asinado esta tarde en San Caetano, a Xunta pon a disposición do Concello de Valdoviño esta nova ferramenta que lle outorga apoio técnico para ofertar, mediante concurso público, unha parcela de 201 m2 da súa titularidade, sita na rúa Atios La Penela. Nº3, para a construción de ata 12 vivendas protexidas.

Así, a Xunta sacará a concurso público en réxime de libre concorrencia esta parcela de titularidade municipal para a construción de fogares protexidos que poderían ser tanto en réxime de alugueiro como de venda. Ademais, deste xeito, facilitarase a información aos promotores, cooperativas e á cidadanía, en xeral, sobre os solos dispoñibles.

O Goberno galego, a través do IGVS, tamén se encargará da redacción dos pregos de bases, os anuncios de licitación, a mesa de contratación e a valoración técnica das ofertas, de maneira que o Concello só terá que ditar a resolución de adxudicación, ademais de participar na mesa de contratación.

O convenio co Concello coruñés é o cuarto que se asina en Galicia, tras o rubricado co Concello das Pontes de García Rodríguez, o Concello de Arnoia, e o Concello de Friol.

Este novo programa está a suscitar o interese de máis administracións locais, coas que a Xunta xa se están a manter contactos, e a conselleira recordou que o prazo par adherirse a este programa permanecerá aberto indefinidamente.

Fonte.- Xunta de Galicia