Os líderes da Unión Europea acordaron pedir á Comisión Europea que presente con urxencia un plan amplo para impulsar a vivenda accesible e apoiar as políticas nacionais neste eido. Por primeira vez, un cume europeo abordou de forma específica a crise habitacional, que, segundo o presidente do Consello Europeo, António Costa, afecta a un dereito fundamental e á confianza cidadá nas institucións. Durante o encontro, Pedro Sánchez propuxo crear un fondo europeo para a construción de vivenda protexida e aplicar medidas que limiten a compra de inmobles con fins non residenciais, ademais de actuar sobre as zonas urbanas con prezos máis tensionados polo turismo.

Os Vinte e sete destacaron a necesidade de aproveitar mellor os fondos comunitarios e estimaron que serían precisos uns 300.000 millóns de euros anuais para abordar a crise. Segundo Eurostat, o prezo medio da vivenda na UE medrou un 58 % na última década, chegando ao 72 % en España e ao 237 % en Hungría. Lisboa, Madrid e Barcelona sitúanse entre as cidades europeas onde as familias destinan unha maior parte dos seus ingresos á vivenda, con ata o 116 % do salario no caso da capital portuguesa.

Fonte.- EFE