A Xunta desenvolverá en Ourense un programa piloto para a adquisición de locais en desuso que serán transformados en vivendas protexidas. Así o destacou hoxe a conselleira de Vivenda e Planificación de Infraestruturas, María M. Allegue, que subliñou que o obxectivo é seguir facilitando o acceso a un fogar.

Sinalou que se trata de converter locais que levan tempo baleiros en fogares, sempre que reúnan as condicións técnicas e xurídicas axeitadas para a transformación en vivendas protexidas.

Detallou que a Xunta realizará unha convocatoria na cidade de Ourense, onde xa non hai máis solo dispoñible para construír. Na oferta pública establecerase un prezo máximo por m2 de adquisición de local, para logo facer unha valoración individual de cada unha das ofertas presentadas. A comunidade de propietarios terá que dar o visto e prace ao cambio de uso de local a vivenda.

Salientou que o Executivo autonómico destinará a esta medida un investimento total de 5M€, dos que 2M€ serán para o ano 2026.

Cambedo da Raia

A conselleira, xunto co delegado territorial da Xunta en Ourense, Manuel Pardo, avanzou esta nova iniciativa na súa visita hoxe ás obras de construción de 64 novas vivendas de promoción pública en Cambedo da Raia. Os traballos avanzan a bo ritmo, o que permitirá que estes 4 bloques estean rematados a finais do vindeiro ano.

Engadiu a estas vivendas as máis de 1.600 planificadas no sector Escorial-21 e as 12 en San Cibrao das Viñas, é dicir, máis de 1.700 novas vivendas que a Xunta ten planificadas.

Puxo en valor os Orzamentos da Xunta para 2026, que consignan 25,5M€ para Ourense, dos que 17,7M€ estarán destinados, entre outras actuacións, á construción de máis vivenda pública e máis solo.

Ademais lembrou que o Goberno galego está a traballar tamén na rehabilitación de vivendas no centro histórico, ao abeiro do programa Rexurbe, dotado con 2M€, que permitirá recuperar 6 vivendas nas rúas Manuel Sueiro e Pelaio.

Fonte.- Xunta de Galicia