Segundo un informe europeo, Lisboa encabeza a lista das cidades onde o alugueiro supón unha maior parte do salario, seguida por Barcelona e Madrid, onde se destina arredor do 74 % dos ingresos a pagar un piso. Na capital catalana, o peso do alugueiro explícase pola falta de solo, limitada pola súa situación entre o mar e a montaña, a presión do turismo e dos alugueiros temporais, así como polo interese de compradores estranxeiros con maior capacidade económica. A estas causas súmase que os salarios non medran ao mesmo ritmo ca os prezos da vivenda e que as medidas reguladoras aplicadas teñen reducido a oferta dispoñible, dificultando o acceso para residentes.

O estudo sinala tamén grandes diferenzas segundo a zona de Europa. No sur, en cidades como Lisboa, Barcelona ou Madrid, a escaseza de vivenda pública, a demanda turística e a forte presión internacional elevan o custo do alugueiro ata porcentaxes moi altas sobre o salario. No norte e centro, urbes como Berlín, Estocolmo ou Helsinki presentan un esforzo moito menor, grazas a un parque público abundante e políticas que favorecen a ampliación da oferta. Mentres, no leste, en cidades como Budapest ou Vilna, o incremento dos prezos está ligado á rápida urbanización e a mercados menos regulados. Ante esta situación xeneralizada, a Unión Europea prepara novas iniciativas para garantir vivenda accesible en todo o continente.

Fonte.- Idealista