Aínda que nos últimos anos moitos xubilados utilizaron doazóns e herdanzas para facilitar o acceso á vivenda aos seus descendentes, cada vez son menos os que consideran esta opción como prioridade. Segundo datos notariais, desde 2017 os maiores traspasaron máis de 3,6 millóns de inmobles, pero o Centro de Investigación Ageingnomics da Fundación Mapfre sinala que moitas persoas están a cambiar de perspectiva: comezan a valorar máis o seu propio benestar e a posibilidade de empregar a súa propiedade para mellorar a súa calidade de vida na etapa da xubilación.

O último Barómetro do Consumidor Sénior mostra que só un 34% dos maiores de 55 anos con vivenda en propiedade pretende deixala á familia, seis puntos menos ca o ano anterior, mentres que un 35% prioriza utilizala para garantir recursos no futuro. Ademais, un 26% estaría disposto a vender ou hipotecar a casa sen renunciar a vivila de por vida mediante fórmulas como a nuda propiedade, a hipoteca inversa ou a vivenda inversa. Aínda así, estas opcións xeran desconfianza na maioría dos propietarios, probablemente por falta de información e garantías claras sobre o seu funcionamento, o que revela unha transformación aínda incipiente no papel da vivenda dentro da economía persoal dos maiores.

Fonte.- Idealista