O Concello de Lugo porá en marcha o programa Lugo Aluga, unha iniciativa municipal que pretende incorporar ao mercado do alugueiro accesible 150 vivendas actualmente baleiras. O plan conta cunha dotación orzamentaria inicial de 150.000 euros e contempla axudas a fondo perdido de ata 900 euros por inmoble para cubrir gastos como o seguro de protección fronte a impagos, danos e desafiuzamentos, a obtención do certificado de eficiencia enerxética, a inspección técnica da vivenda e a tramitación da solicitude. Ademais, os propietarios poderán beneficiarse dunha bonificación do 95 % no Imposto sobre Bens Inmobles (IBI) e de posibles vantaxes fiscais, sempre que cumpran os requisitos establecidos. A renda máxima prevista é de 700 euros mensuais por unidade de convivencia, con 35 euros adicionais por cada convivente extra.

O programa busca facilitar o acceso á vivenda mediante prezos asumibles e ofrecer garantías tanto ás persoas propietarias como ás inquilinas. As persoas solicitantes recibirán asesoramento legal e fiscal, acompañamento durante a formalización dos contratos e mediación en caso de conflitos. As vivendas serán sometidas a inspeccións técnicas antes da súa incorporación á bolsa para comprobar que cumpren as condicións de habitabilidade. A empresa municipal Evislusa será responsable da información, a tramitación e a intermediación entre propietarios e demandantes de vivenda. Os inmobles poderán permanecer no programa durante un máximo de cinco anos.

Fonte.- El Progreso