A Cámara de Deputados de México aprobou unha reforma da Lei de Vivenda que incorpora explicitamente o dereito de toda persoa a unha vivenda adecuada, con 354 votos favorables fronte a 95 en contra. O texto será remitido ao Senado para continuar a súa tramitación. A modificación introduce parámetros obxectivos baseados en estándares internacionais, substituíndo o concepto previo de “vivenda digna e decorosa” por outro máis amplo. Entre os criterios establecidos inclúense aspectos como a seguridade xurídica da tenza, a habitabilidade, a accesibilidade económica, a dispoñibilidade de servizos e a adecuación cultural. A reforma tamén se aliña cos cambios constitucionais previos que amplían o dereito á vivenda a todas as persoas e non só ás familias.

A iniciativa, que integra propostas do Executivo e de distintos grupos parlamentarios, contempla novas vías de financiamento para adquisición, construción, mellora e autoprodución de vivendas, así como fórmulas de alugueiro con opción a compra. Ademais, busca apoiar un programa estatal que prevé a construción de 1,8 millóns de vivendas baixo estes criterios. Porén, grupos da oposición manifestaron críticas ao considerar que o novo modelo incrementa a intervención pública, podendo xerar conflitos de interese e riscos na xestión dos recursos destinados á vivenda, así como limitar a capacidade de elección das persoas traballadoras.

Fonte.- Heraldo de México