Durante os primeiros cinco meses de 2025, as transmisións de vivendas na provincia de Pontevedra estiveron só un 7,8% por debaixo dos rexistros históricos de 2007, ano previo ao estoupido da crise das hipotecas subprime. No mes de maio, as Rías Baixas lideraron o crecemento inmobiliario en Galicia, cun incremento de máis do 62% en comparación co mesmo mes do ano anterior. En total, na provincia de Pontevedra rexistráronse 1.292 operacións de compravenda, moi por riba das 796 de maio de 2024.

A nivel galego, o incremento foi do 65,4%, só superado por Castela-A Mancha. Estes datos sitúan a Galicia por riba da media estatal, que tivo un aumento do 39,7% nese mes, cun total de máis de 61.000 transaccións rexistradas.

A recuperación do sector inmobiliario está apoiada, sobre todo, pola vivenda usada, que representa case o 80% do mercado e leva nove meses de subas consecutivas. As compravendas de vivendas novas tamén experimentaron un notable repunte, cun crecemento superior ao 42% en maio, marcando o mellor rexistro para ese mes desde 2012. A maioría das transaccións corresponderon a vivendas libres, mentres que as protexidas aumentaron de forma máis moderada. 

Fonte.- Diario de Pontevedra