Segundo un estudo realizado por Fotocasa sobre «A negociación no mercado dos alugueiros», no último ano, un 34% dos que alugaron unha vivenda negociaron as condicións, un dato non moi distinto ás taxas de negociación precovid, cando un 32% negociou o prezo do aluguer. Mesmo, é unha porcentaxe máis baixa que o rexistrado en 2019, cando o 37% dos que alugaron tentaron negociar.

Pero, a diferenza reside na cantidade de inquilinos que conseguiron, con éxito, abaratar o prezo do seu alugueiro. No último ano e tras a pandemia, os inquilinos que alugaron unha vivenda e negociaron conseguiron mellores resultados. O 75% (ou 3 de cada 4) dos que alugaron unha vivenda como inquilinos e negociaron (ese 34%) pactaron un cambio de prezo á baixa fronte ao 11% que consegue todo o contrario: ver crecer a súa renda mensual. 

En 2020, o 66% pactou unha baixada no prezo fronte ao 20% que tivo que pagar máis. A transformación do mercado do aluguer, na que os prezos presentan a maior caída da última década, foi propiciada polo descenso da demanda nas zonas máis céntricas das grandes cidades e o enfraquecemento da participación das franxas de idade máis maduras. Esta suma de factores fixo que o inquilino se atope nunha posición privilexiada á hora de fixar o prezo da vivenda. 

Por outra banda, 9 de cada 10 inquilinos que pactaron unha rebaixa no prezo do aluguer conseguiron unha baixada, como máximo, do 15% sobre o prezo inicial, moi similar ao que conseguiron abaratar os que alugaron en 2020. É dicir, para un piso duns 80 metros cadrados cun valor inicial 850 euros, conseguiuse unha rebaixa máxima de 127,50 euros, polo que pactaron unha renda tras a negociación de 722,50 euros.

Fonte | Fotocasa