O presidente do Goberno, Pedro Sánchez, presentou en Madrid o novo fondo público de investimento “España Crece”, que prevé mobilizar ata 23.000 millóns de euros combinando recursos públicos e privados co obxectivo de reducir o déficit de vivenda. A iniciativa fixa como meta a construción de 15.000 vivendas anuais e contará cunha base inicial de 10.500 millóns procedentes do Plan de Recuperación, xestionados polo Instituto de Crédito Oficial (ICO). Segundo explicou, trátase do maior volume de financiamento en condicións favorables destinado ata o momento a facer fronte ás dificultades de acceso á vivenda, especialmente entre a mocidade, promovendo a participación do investimento privado sen fomentar prácticas especulativas.

O fondo aspira ademais a mobilizar ata 120.000 millóns de euros a través de préstamos bancarios, débeda privada e achegas de investidores nacionais e internacionais. Esta ferramenta substituirá os recursos europeos de Next Generation EU e ampliará o seu ámbito de actuación a sectores como a enerxía, a dixitalización, a intelixencia artificial, a reindustrialización, a economía circular, as infraestruturas, a auga e o saneamento ou a seguridade, mediante participacións minoritarias en empresas. O Executivo enmarca a medida na necesidade de reforzar a produtividade, desenvolver o mercado de capitais e facilitar o acceso das pemes ao financiamento, ao tempo que defende a harmonización normativa na Unión Europea sen apostar pola desregulación.

Fonte.- El Periodico