O presidente da Generalitat, Salvador Illa, durante a primeira sesión do Debate de Política Xeral (DPG) anunciou un novo programa de vivenda pública para construír 50.000 vivendas públicas ata 2030 cun investimento de 4.400 millóns de euros ata final de mandato. O presidente argumentou que durante o seu mandato se investirán 1.100 millóns de euros cada ano para cumprir con este obxectivo, polo que "non haberá ningunha comunidade autónoma que invista tanto diñeiro en materia de vivenda como Cataluña", afirma. Avogou tamén por un cambio de concepto en relación ás políticas de construción de vivenda pública. 

Illa anunciou tamén a creación dunha reserva pública de solo para axudar aos municipios para promover o solo dispoñible, que se articulará a través dunha convocatoria da Generalitat para construír promocións de vivenda protexida de alugueiro, e cuxa primeira convocatoria será en febreiro de 2025. Doutra banda, en relación á velocidade de execución da vivenda, Illa prometeu reducir nun 50% o tempo de entrega das chaves, de 100 a 50 meses. Detallou que se fará "establecendo unha licenza básica para axilizar a tramitación" para iniciar obras de nova planta ou de rehabilitación mentres se tramita a licenza urbanística. Esta licenza obterase mediante un único expediente que xerará a licenza básica e urbanística coa presentación do proxecto técnico, a declaración de conformidade urbanística e outros documentos esenciais.

Durante a súa comparecencia, tamén avanzou que o Govern creará un "plan piloto dun comité de axilidade urbanística para a simplificación e a axilización da tramitación grazas á coordinación institucional", e un "fondo público de emancipación" dotado de 500 millóns de euros para financiar o 20% dos gastos de compra de 12.000 vivendas para mozos menores de 35 anos, unha axuda para devolver unha vez paga a hipoteca ou coa venda do piso.

Fonte.- Idealista