A compravenda de vivendas en España rexistrou un incremento interanual do 1,3 %, ata alcanzar as 48.674 operacións, segundo a Estatística Rexistral Inmobiliaria do Colexio de Rexistradores. Pola súa banda, a constitución de hipotecas destinadas á adquisición de vivenda aumentou un 1,6 %, cun total de 33.649 préstamos. No ámbito autonómico, Estremadura encabezou o crecemento das compravendas, cun 19,3 % máis, seguida de Cantabria (13,7 %) e Murcia (13,4 %). En canto ao volume de operacións, Andalucía liderou a clasificación con 9.402 transaccións, por diante de Cataluña (8.292) e da Comunidade Valenciana (7.427).

A evolución das hipotecas tamén presentou diferenzas territoriais. Estremadura rexistrou o maior incremento, cun 23,5 %, seguida de Navarra (22,9 %) e Canarias (19 %). No extremo contrario, A Rioxa experimentou o descenso máis acusado, cunha caída do 28,3 %, seguida das Baleares (25,8 %) e Aragón (12,9 %). Andalucía volveu ocupar a primeira posición polo número de préstamos hipotecarios formalizados, con 6.629, seguida de Cataluña, con 6.101, a Comunidade Valenciana, con 4.261, e Madrid, con 4.174. Galicia rexistrou descensos tanto nas compravendas de vivendas, cun 0,4 % menos, como na constitución de hipotecas, cunha caída do 5,9 %.

Fonte.- Idealista