A compravenda de vivendas en Galicia incrementouse un 7,6% en 2025, ata un total de 30.560 operacións, segundo datos do Consello Xeral do Notariado. Trátase do segundo rexistro máis elevado da serie histórica na comunidade, só por detrás das 39.524 operacións de 2007, e por riba do aumento medio estatal do 4,4%. O prezo medio situouse en 1.196 euros por metro cadrado, cun avance do 4,4%, inferior ao 7,5% do conxunto do Estado, o que supón o quinto valor máis alto da serie galega. Por tipoloxía, as vivendas unifamiliares lideraron o crecemento cunha suba do 14,2%, ata 9.002 unidades, mentres que os pisos aumentaron un 5%, ata 21.559 operacións.

No conxunto estatal contabilizáronse 752.661 compravendas, un 4,4% máis, tamén segundo mellor dato histórico tras as 853.568 de 2007. O prezo medio nacional alcanzou os 1.902 euros por metro cadrado, superando o máximo de 2007 (1.832 euros), con incrementos destacados en Rexión de Murcia e Cantabria (+14,4%), Comunidade de Madrid (+13,3%) e Illas Canarias (+12%). As hipotecas para adquisición de vivenda en Galicia medraron un 17,6%, por riba do 13,7% estatal, cun importe medio de 132.425 euros. No Estado formalizáronse 389.090 préstamos para compra de vivenda (+13,7%), cunha contía media de 173.989 euros, nun exercicio no que os prezos avanzaron en todas as comunidades autónomas e no que as operacións creceron en catorce territorios.

Fonte.- Galicia Press