Nos últimos tres anos, o prezo do alugueiro en Galicia experimentou un incremento do 27,1%, moi por enriba da subida dos salarios, que só medraron un 8,9% no mesmo período. Esta desigual evolución provocou un forte desequilibrio económico para moitas familias galegas, que ven como o custo de arrendar unha vivenda segue a afastarse do seu poder adquisitivo. Segundo o informe elaborado por Fotocasa e InfoJobs, en 2024 o prezo medio do alugueiro sitúase en 9,43 euros por metro cadrado, fronte aos 7,42 euros de 2021. Isto supón que un piso de 80 metros custa uns 9.053 euros ao ano, mentres que o salario medio anual apenas chega aos 25.299 euros, o que implica que os fogares destinan xa preto do 47% dos seus ingresos ao alugueiro, moi por enriba do limiar recomendable.

Este desaxuste responde a factores estruturais, como unha elevada demanda de vivendas fronte a unha oferta cada vez máis reducida, o que provoca un mercado inmobiliario especialmente tensionado. A situación agrávase cun contexto laboral marcado pola inestabilidade e a precariedade, a pesar das melloras que trouxo a reforma laboral. Nos últimos cinco anos, o prezo do alugueiro en Galicia medrou un 39,7%, mentres que os salarios non experimentaron un incremento proporcional. A directora de Fotocasa advirte de que este escenario consolida un modelo residencial desigual e excluínte, mentres que desde InfoJobs sinalan que, malia o crecemento moderado dos salarios nos últimos anos, a perda de poder adquisitivo pola inflación segue condicionando o acceso á vivenda.

Fonte.- Cadena Ser