Un 21% dos galegos desexaría cambiar de vivenda, pero só un 4% puxo á venda un inmoble residencial no último ano. Estes datos están en liña coas cifras do mercado nacional, onde tamén se observa unha gran diferenza entre a demanda (23%) e a oferta (6%). No conxunto de Galicia, o 24% da poboación participou no mercado inmobiliario durante o último ano, un 3% menos que a media española (27%).

Estas cifras forman parte do informe "Radiografía do mercado da vivenda en Galicia en 2024", realizado por Fotocasa Research, que analiza o comportamento do mercado inmobiliario galego durante o primeiro semestre do ano. O informe destaca un desaxuste entre a oferta e a demanda, con moita máis xente interesada en adquirir ou alugar unha vivenda que persoas que realmente poidan ofertar un inmoble. O mercado galego mostra unha predilección polo segmento de compravenda, que supera ao de alugueiro, cun 13% de galegos activos na compra fronte ao 10% que participou no alugueiro.

Por último, o mercado de alugueiro en Galicia tamén se presenta como menos dinámico en comparación coa compravenda e co mercado nacional. Só o 10% dos galegos participou no alugueiro durante o último ano, cun 6% que conseguiu alugar unha vivenda e un 4% que non logrou arrendar inmoble algún. Pola súa parte, o mercado de compravenda tamén mostra sinais de tensión, xa que a demanda supera de forma importante a oferta, o que podería causar un incremento nos prezos, tanto na compra como no alugueiro.

Fonte.- Fotocasa