O presidente da Xunta, Alfonso Rueda, anunciou hoxe que a Xunta investirá 2 millóns de euros para a construción do novo pavillón de Monte Porreiro, ademais de que colaborará, con 1 millón de euros, en actuacións de saneamento en Pontevedra.

Así se recolle no protocolo que asinou esta mañá co alcalde de Pontevedra, Miguel Anxo Fernández Lores, e que puxo como exemplo de colaboración institucional entre administracións. Neste sentido, resaltou a importancia de visibilizar que “falando e poñéndonos de acordo e vendo cales son as prioridades” as administracións “podemos colaborar con independencia de cores políticas”.

A construción do novo pavillón virá a aumentar as infraestruturas deportivas da cidade, ademais de que suporá contar cunha instalación que aspira a ser referente en tenis de mesa, unha disciplina en auxe que agora mesmo conta cunhas 1.700 licenzas en Galicia. O obxectivo é que ese pavillón estea aberto tamén a outros deportes, e que contribúa a fomentar a actividade física entre a veciñanza.

Neste eido, o presidente autonómico puxo en valor o impulso da Xunta ao deporte da cidade, co futuro Centro de Alto Rendemento, e sinalou que outro dos temas abordados na reunión foi o posible apoio da Administración autonómica ao campionato de tríatlon que acollerá a cidade. Un encontro ao que, segundo sinalou o presidente autonómico, poderían sumarse novos patrocinadores unha vez que o Goberno central desbloquee os beneficios fiscais para as empresas colaboradoras co Xacobeo 2027.

En canto ao saneamento, as actuacións concretas determinaranse a través de reunións técnicas entre Concello e Xunta. Tal e como está recollido no protocolo, a Administración autonómica achegará o financiamento, mentres que o goberno municipal será o encargado de realizar as actuacións.

Ademais, o acordo asinado hoxe tamén recolle que se continuará avanzando na celebración de reunións técnicas para facilitar o traslado das instalacións autonómicas que están situadas na Xunqueira da Gándara.  Neste sentido, Rueda sinalou que “a intención da Xunta de Galicia, negociando co Concello de Pontevedra, é que esas dúas zonas se liberen e queden para disfrute de todos os veciños”.

Compromiso con Pontevedra

O titular do Executivo autonómico inscribiu estes proxectos no compromiso que a Xunta mantén con esta cidade. Así, entre outras iniciativas, referiuse ao Novo Montecelo; a rehabilitación do Pazo de Lourizán; ou ao proxecto de dragaxe do Lérez.

Tamén destacou Rueda que a colaboración entre o Concello de Pontevedra e a Xunta de Galicia en materia de vivenda protexida está sendo “un exemplo”, apuntando que a vai colocar “nun lugar punteiro entre as cidades galegas”.

Fonte.- Xunta de Galicia