O presidente da Xunta, Alfonso Rueda, destacou hoxe a aposta da Xunta en materia de vivenda, que ten fixado como obxectivo construír 6.000 máis en seis anos (desde o inicio da lexislatura, en 2024, ata 2030). Delas, xa hai 3.000 que están en marcha e a previsión é que as primeiras chaves se poidan entregar este ano.

Así o sinalou esta mañá durante a súa participación nun almorzo informativo organizado por The Objective baixo o título Galicia, modelo de desenvolvemento exitoso. Alí, lembrou que o obxectivo é chegar ás 10.000 vivendas públicas ao final desta década, un esforzo que se complementa con outras iniciativas como o desenvolvemento de solo para 25.000 vivendas (20.000 delas protexidas), as axudas á rehabilitación, o impulso de aloxamentos compartidos ou a mobilización de vivendas baleiras.

O titular do Executivo galego valorou que é posible acometer iniciativas coma esta grazas á estabilidade dun goberno centrado en solucionar os problemas da cidadanía. Neste sentido, citou os esforzos que se están facendo en materia de educación ou sanidade.

Rueda apuntou que a educación galega é unha das máis accesibles, ao ter sido pioneira en implantar a gratuidade desde os 0 anos ata os estudos universitarios. Tamén salientou os esforzos en materia sanitaria, especialmente en materia de innovación e prevención, como a través da futura posta en marcha do centro de protonterapia, que converterá á Galicia na primeira sanidade pública en ofrecer esta terapia contra o cancro.

Xacobeo 2027

O presidente galego tamén se referiu á celebración o próximo ano do Xacobeo 2027, unha oportunidade que cualificou como histórica e que traerá beneficios non só a Galicia, senón ao conxunto de España e mesmo a Portugal.

Ao respecto, demandou ao Goberno central que axilice a posta en marcha de beneficios fiscais para as empresas que participan na organización do Ano Santo co fin de favorecer a colaboración público-privada.

Fonte.- Xunta de Galicia