A Xunta acaba de licitar as obras dunha promoción de 17 vivendas públicas no Concello de Culleredo, que supoñen un investimento total de 3,5M€. A conselleira de Vivenda e Planificación de Infraestruturas, María M. Allegue, deu conta desta licitación na súa visita ao concello coruñés.

Os futuros fogares distribuiranse nunha promoción de baixo e catro alturas situada na rúa Alcalde Domingo Sierra, nunha parcela que foi cedida pola Consellería de Facenda.

A fachada principal do futuro inmoble abrirase a zonas verdes e varios equipamentos de carácter educativo e deportivo do concello e, das 17 vivendas previstas, 8 serán de 3 dormitorios e as restantes 9 de 2 estancias (2 delas adaptadas).

A conselleira destacou este proxecto residencial, con vivendas públicas de calidade e eficientes. As empresas terán de prazo ata o 23 de decembro para presentar as súas ofertas.

Fonte.- Xunta de Galicia