A Enquisa estrutural a fogares é unha operación estatística de carácter anual dirixida aos fogares galegos, elaborada co obxectivo de obter información sobre as súas características socioeconómicas e as súas condicións de vida. A información difundida mediante esta enquisa procede dunha mostra representativa de fogares e persoas residentes en Galicia, seleccionada para reflectir a realidade demográfica, económica e social da comunidade autónoma.

O obxectivo desta actividade é describir a composición e a estrutura dos fogares galegos, así como analizar aspectos relacionados coa súa situación económica e social. Entre outros ámbitos, a enquisa proporciona información sobre a tipoloxía dos fogares, a súa estrutura por idades, a emancipación residencial da poboación nova, os ingresos e gastos dos fogares, a súa capacidade para chegar a fin de mes e distintas situacións de vulnerabilidade económica e social.

A Enquisa estrutural a fogares organízase en dous módulos: un módulo xeral, de periodicidade anual, que recolle información estrutural sobre os fogares, e un módulo específico, de carácter variable, destinado á análise de aspectos concretos de interese. Este documento presenta os resultados correspondentes ao módulo xeral do ano 2024.

Documento.- Enquisa estrutural a fogares. Módulo xeral. 2024

Extraído de: IGE