A escaseza de vivendas é un dos factores principais que explican o aumento dos prezos no mercado inmobiliario, tanto na compra como no alugueiro. En Lugo, a provincia galega onde máis caeu a oferta de vivenda nova nos últimos dous anos, as cifras son significativas. Segundo a Federación Galega de Empresas Inmobiliarias (Fegein), no 2022 saíron á venda 1.902 vivendas novas, mentres que en 2024 a cifra baixou a 1.525, un descenso do 19,85 %. A nivel autonómico, este ano Galicia rexistrou o seu mínimo histórico en obra nova, con 16.730 vivendas postas á venda fronte ás 19.005 do 2022, nun contexto de demanda crecente que provoca unha alza xeneralizada dos prezos.

A subida de prezos tamén se reflicte nos custos por metro cadrado. En Lugo, o prezo medio do metro cadrado situouse en 1.050 euros, ascendendo a 1.300 euros na capital provincial, onde un piso de 100 m² custa uns 130.000 euros. No alugueiro, o metro cadrado en Lugo capital alcanza os 6,90 euros, o que se traduce nun alugueiro medio de 690 euros por un piso de 100 m², mentres que no resto da provincia baixa a 6,10 euros por metro cadrado. A nivel galego, o prezo medio de compra do metro cadrado sitúase en 1.450 euros, con grandes diferenzas entre cidades. Mentres que en A Coruña un piso de 100 m² supera os 250.000 euros, en Ferrol, a só 50 quilómetros, o prezo rolda os 95.000 euros.

No caso dos alugueiros, Vigo destaca como a cidade galega máis cara, cun prezo medio de 10,30 euros por metro cadrado, superando a A Coruña por dez céntimos. En ambas urbes, o alugueiro dun piso de 100 m² excede os 1.000 euros. Outras cidades como Santiago e Pontevedra seguen esta tendencia, aínda que con prezos lixeiramente inferiores, mentres que en Lugo e Ferrol os custos son máis baixos, situándose por baixo dos 700 euros mensuais para vivendas de 100 m². Ademais, Vigo destaca polo crecemento dos pisos turísticos, superando xa os 2.000, o que tamén está a influír na escalada dos prezos.

Fonte.- El Progreso