O prezo da vivenda en España rexistrou unha suba interanual do 11,2% no último trimestre de 2024, alcanzando un máximo histórico de 2.271 euros por metro cadrado, segundo o índice de prezos de idealista. No mesmo período, o incremento trimestral foi do 4,1%. Francisco Iñareta, portavoz de idealista, sinala que este contexto é o resultado dunha crise de oferta provocada pola limitación na construción de novas vivendas, a burocracia, a escaseza de man de obra e a falta de políticas efectivas, o que leva a unha tensión crecente no mercado ante unha demanda que non deixa de medrar.

Durante o último ano, case todas as capitais españolas experimentaron subas, sendo Valencia a cidade cun maior incremento anual (24%), seguida de Málaga (21,5%), Madrid (20,2%) e Alicante (18,2%). Pola contra, Huesca foi a única capital onde os prezos caeron (-0,4%). En Galicia, A Coruña destacou cun aumento do 14,7%, mentres que Ourense rexistrou un modesto incremento do 1,2%. Entre as cidades máis caras, San Sebastián lidera o ranking con 5.681 euros/m², seguida de Madrid e Barcelona. No lado oposto, Zamora mantense como a máis accesible, cun prezo de 1.168 euros/m².

A nivel rexional, todas as comunidades autónomas experimentaron subas de prezos, encabezadas por Madrid (17,5%) e Canarias (17%). Baleares segue sendo a rexión máis cara (4.707 euros/m²), superando a Madrid (3.771 euros/m2) e Euskadi (3.076 €/m2), mentres que Castela-A Mancha (957 euros/m2), Estremadura (986 euros/m2) e Castela e León (1.216 euros/m2) figuran como as máis económicas. Nas provincias, Baleares (4.707 euros/m2), Madrid (3.771 euros/m2) e Guipúscoa (3.746 euros/m2) ocupan os primeiros postos de custo, mentres que Cidade Real (751 euros/m2), Xaén (844 euros/m2) e Cuenca (846 euros/m2) presentan os prezos máis baixos. Este panorama reflicte un mercado tensionado, no que a falta de oferta e a crecente demanda seguen presionando os prezos cara arriba.

Fonte.- Idealista