Durante o último trimestre do ano pasado, o 17% das vivendas alugadas a través de Idealista atoparon inquilino en menos de 24 horas, unha lixeira diminución respecto ao mesmo período de 2023. Este fenómeno, coñecido como "alugueiro exprés", destaca especialmente en cidades como Vitoria e Girona, onde o 32% e o 29% das vivendas, respectivamente, se alugaron nun só día. Outras cidades con altas porcentaxes inclúen San Sebastián (28%), Lugo e Burgos (26%), Santa Cruz de Tenerife (24%) e Ourense e Logroño (23%).

Nas grandes urbes, ademais de San Sebastián, Barcelona lidera a tendencia co 20% dos alugueiros realizados en menos dun día, seguida por Palma e Málaga (19%), así como Alicante e Sevilla (18%). Pola contra, Madrid (13%) e Valencia (14%) quedan por baixo da media estatal. Ademais, en cidades como Cáceres, Melilla e Soria este fenómeno practicamente non existe, e en Segovia e Badajoz apenas alcanza o 6%.

O alugueiro exprés experimentou subas notables en cidades como Ceuta, que pasou do 0% ao 20% en só un ano, ou Guadalajara e Ávila, onde tamén se duplicou. Pola contra, Madrid reduciu a súa incidencia en tres puntos, e en Soria practicamente desapareceu. A nivel provincial, Zamora destaca cun 44% de alugueiros exprés, seguida por Teruel (33%) e Álava (31%), mentres que as menores taxas rexístranse en Soria, Badajoz e Cuenca. Os datos foron analizados por Idealista/data, plataforma especializada en estudos de mercado inmobiliario en España, Italia e Portugal.

Fonte.- Idealista