A actividade inmobiliaria en España medrou un 4,2% no último trimestre de 2024, encadeando dous períodos consecutivos de incremento e acadando unha taxa anual do 15,7%, segundo os datos do Índice Rexistral de Actividade Inmobiliaria (IRAI) elaborado polo Colexio de Rexistradores. O aumento responde, sobre todo, ao crecemento na área de propiedade, con máis compravendas e hipotecas, mentres que o sector mercantil, que inclúe construción e inmobiliaria, tamén rexistrou unha mellora, aínda que máis moderada. O índice suavizado, que elimina factores estacionais, rexistrou un incremento do 3,6%, levando a actividade inmobiliaria a niveis próximos aos máximos históricos, ao situarse en máis de 124 puntos, fronte aos 126 alcanzados entre finais de 2006 e principios de 2007. Pola súa parte, o IRAI estándar situouse en 140 puntos, igualando os valores de comezos de 2007.

Desde o punto de vista da demanda, as compravendas aumentaron un 3,1% respecto ao trimestre anterior, mentres que as hipotecas creceron un 8,1%, pechando o ano cun incremento conxunto do 4,7%. No ámbito da oferta, o sector da construción avanzou un 2,8% e o inmobiliario un 2,3%, sumando un crecemento total do 2,7% na área mercantil. Os rexistradores destacan que a tendencia ascendente do IRAI se acelerou no último trimestre do ano, tras superar cinco meses de descensos, consolidando un crecemento anual do 15,7%. Este avance explícase en boa medida polo aumento do 35,8% no número de hipotecas e do 33,5% nas compravendas, mentres que os prezos e importes rexistraron subas máis moderadas do 5,5% e 8,9%, respectivamente. Así, o índice global de compravendas pechou 2024 cun crecemento do 21,2%, mentres que o de hipotecas aumentou un 20,6%, e a actividade mercantil no sector inmobiliario e da construción medrou un 2,3% ao longo do ano.

Fonte.- Idealista