A crise da vivenda nas grandes cidades europeas levou ás institucións comunitarias a tomar medidas, a pesar de non ter competencias directas nesta área. Por primeira vez, a Comisión Europea designou un comisario de Vivenda, o danés Dan Jørgensen, que traballará dentro da vicepresidencia de Enerxía e Transición Ecolóxica, liderada pola española Teresa Ribera. O pasado 1 de febreiro creouse o Housing Task Force, un grupo de traballo centrado en elaborar un Plan de Vivenda Asequible e analizar as causas estruturais da crise habitacional. O proceso, con fases de diagnóstico e intercambio de boas prácticas entre países e rexións, non verá resultados ata polo menos o próximo ano. Paralelamente, o Parlamento Europeo tamén impulsará un comité especial para abordar esta problemática.

O obxectivo principal deste plan é ofrecer apoio técnico ás administracións e fomentar unha estratexia europea para a construción de vivenda pública, contando tanto con fondos públicos como privados. Tamén se busca mobilizar recursos do Banco Europeo de Investimentos (BEI) e doutros fondos comunitarios. En Cataluña e Barcelona, por exemplo, xa se teñen aplicado préstamos do BEI para financiar proxectos de vivenda pública de alugueiro. Ademais, iniciativas recentes apostan pola construción de vivendas accesibles e sustentables, así como pola rehabilitación de edificios xa existentes para mellorar a súa eficiencia enerxética.

A situación da vivenda en Europa presenta grandes diferenzas entre países. España, cun parque de vivenda social do 3,3%, inviste moito menos ca outros estados europeos, como os Países Baixos ou Austria. O prezo da vivenda experimentou subas considerables nos últimos anos, cun aumento medio do 48% no custo de compra e do 18% no alugueiro. A nova estratexia europea tamén estudará fórmulas para abaratar os custos de construción, mellorar a formación dos traballadores do sector e atraer investimentos para vivenda sustentable. Ademais, analizaranse problemas como o alugueiro turístico de curta duración, que en certos lugares distorsiona o mercado inmobiliario.

Fonte.- El País