A redución da oferta de vivenda en alugueiro provocou un incremento exponencial na competencia entre os demandantes, multiplicándose case por catro desde antes da pandemia de 2020. Segundo datos de Idealista, o número de interesados por cada vivenda pasou de sete no último trimestre de 2019 a 30 no mesmo período de 2024, un aumento do 319%. Francisco Iñareta, portavoz da plataforma, subliña que a dificultade para acceder a unha vivenda xa non se debe só aos prezos elevados, senón tamén ao endurecemento dos requisitos esixidos polos propietarios. Os denominados "castings" priorizan ingresos estables e garantías de pago, excluíndo cada vez a máis familias do mercado, primeiro as máis vulnerables e logo aquelas en risco de ser expulsadas. Iñareta alerta de que sen políticas que incentiven a ampliación da oferta, a crise do alugueiro seguirá agravándose.

Entre as cidades máis afectadas polo aumento da competencia destaca Bilbao cun incremento do 523%, seguida por Palma (495%) e Barcelona (478%). No entanto, as subas máis acusadas danse en Zamora (810%), Burgos (808%) e Ávila (799%). Pola contra, Cádiz (176%), Pamplona (223%) e Pontevedra (231%) rexistran incrementos máis moderados. No 2019, Pamplona era a cidade con máis demanda por vivenda en alugueiro (19 familias por anuncio), pero en 2024 a situación máis extrema dáse en Vitoria, con 108 familias competindo por cada vivenda dispoñible. Salamanca, aínda sendo a cidade con menor presión, experimenta unha subida significativa con 7 familias por anuncio, evidenciando un problema xeneralizado en todo o país.

Fonte.- Idealista