O número de hipotecas para mercar unha vivenda medrou un 11% en xaneiro en comparación ao mesmo mes do ano anterior, acadando as 38.058 operacións, a cifra máis alta para un inicio de ano desde 2020. Este incremento prodúcese nun contexto de baixada dos tipos de interese e caída do euríbor, que en xaneiro roldaba o 2,5%. O tipo medio de interese situouse no 3,08%, o máis baixo dende abril de 2023, mentres que o importe medio das hipotecas aumentou un 11,9%, chegando aos 152.233 euros. O 64,2% das hipotecas foron a tipo fixo e o 35,8% a tipo variable, mantendo un prazo medio de 25 anos. A nivel mensual, respecto a decembro, a sinatura de hipotecas medrou un 18%, malia unha leve caída do importe medio.

Este dinamismo débese a un cambio no perfil do comprador, impulsado pola confianza no mercado e a mellora das condicións bancarias. Segundo Fotocasa, moitos compradores que antes non podían acceder a unha hipoteca están a reconsiderar a opción grazas á redución dos tipos. Isto podería favorecer o retorno de compradores mozos con menos aforro. Ao tempo, obsérvase un aumento de compradores con maior capacidade económica que precisan menos financiamento. As previsións para 2025 son optimistas, cun posible aumento nas transaccións debido ás esperadas baixadas de tipos por parte do BCE. Porén, o sector tamén anticipa un encarecemento da vivenda pola falta de oferta suficiente, o que podería excluír de novo a certos perfís compradores malia as mellores condicións de crédito.

Fonte.- El Economista