O Banco de España confirmou unha nova baixada do euríbor en maio, situándoo no 2,081 %, lixeiramente por debaixo do dato de abril, e cun descenso de 1,6 puntos respecto ao ano pasado. Este retroceso supón un alivio importante para os fogares con hipotecas a tipo variable que revisan as súas condicións neste momento, permitindo un aforro medio duns 100 euros mensuais en Galicia. Aínda que os analistas non coinciden sobre cando deixará de estar por debaixo do 2 %, todas as miradas están postas nas vindeiras decisións do Banco Central Europeo, que vén de aplicar o seu sexto recorte consecutivo nos tipos de interese para combater as tensións comerciais globais.

A baixada dos tipos está a impulsar o mercado inmobiliario galego, onde as hipotecas creceron preto dun 33 % no primeiro trimestre de 2025, mentres que as compravendas aumentaron un 14,6 %. En resposta, o sector da construción intensificou os proxectos de promoción. As licenzas de obra concedidas en xaneiro e febreiro deste ano contemplan levantar 637 novas vivendas, un 55 % máis que no mesmo período de 2024. Tamén medraron con forza os proxectos de rehabilitación, cun aumento do 53 %, ata acadar as 197. Todo isto confirma unha tendencia de forte reactivación que se consolidou ao longo de 2024.

As cifras totais do pasado ano mostran un rexurdimento sen precedentes desde 2010: 3.578 vivendas de nova planta, das cales máis dun terzo foron unifamiliares. Ademais, rehabilitáronse 776 vivendas e demoléronse parcialmente ou totalmente outras 289, deixando un saldo positivo de 4.065 novos inmobles no mercado. Vigo liderou as licenzas para novas construcións (610 vivendas), seguido da Coruña, Sanxenxo, Lugo e Santiago. Outros concellos como Foz, Barreiros ou Miño tamén rexistraron incrementos espectaculares, mentres que localidades como Ourense, Oleiros ou Moaña experimentaron caídas. A superficie total destinada a novas vivendas superou os 834.000 metros cadrados e a inversión alcanzou os 431,5 millóns de euros.

Fonte.- Faro de Vigo