O encarecemento progresivo da vivenda en España segue a ser a principal preocupación da cidadanía, especialmente desde finais do ano pasado. Este aumento de prezos afecta non só ao mercado libre, senón tamén á vivenda de protección oficial (VPO), que acaba de acadar un máximo histórico segundo os datos do Ministerio de Vivenda. No primeiro trimestre de 2025, o prezo medio da VPO superou por vez primeira os 1.170 euros por metro cadrado, cunha suba interanual do 0,2%. Aínda que en xeral a VPO continúa sendo máis económica que a vivenda libre —que ronda os 2.033 euros/m²—, hai 11 provincias nas que a vivenda protexida é, paradoxalmente, máis cara que a libre, destacando casos como Jaén, Ciudad Real ou Ourense.

En provincias como Jaén e Ciudad Real, a diferenza chega a superar os 265 euros por metro cadrado en favor da VPO. Tamén se observan disparidades significativas en lugares como Cuenca, Teruel ou Zamora, mentres que noutras como Lleida ou Córdoba a diferenza é menor, pero segue existindo. Pola contra, nas grandes capitais e zonas costeiras como Madrid, Baleares ou Barcelona, a vivenda libre continúa moi por riba da protexida, chegando a duplicar ou incluso triplicar o seu valor. En canto aos prezos máis baixos, as provincias de Cáceres e Badajoz rexistran os valores máis accesibles dentro da VPO, con menos de 750 euros/m². Esta realidade mostra a complexidade territorial do acceso á vivenda e evidencia que o modelo de protección oficial non sempre garante unha opción máis económica.

Fonte.- Idealista