As operacións de compravenda incrementáronse en Vigo nun 37% durante o primeiro trimestre de 2025, chegando ás 811 transaccións, un dato que non se vía desde 2006. Este repunte explícase pola atracción da cidade para novos residentes e traballadores, mentres a oferta segue sendo limitada á espera de que o novo Plan Xeral reactive a construción. O prezo por metro cadrado situouse nos 2.021 euros, un 9,7% máis ca no mesmo período de 2024, e un 39% por riba respecto ao inicio da pandemia. Só no ano 2008, en pleno auxe inmobiliario, se acadaron valores superiores.

Este contexto de demanda alta e prezos en ascenso tamén está a impulsar o financiamento. Entre xaneiro e maio, o número de hipotecas en Vigo e no conxunto da provincia de Pontevedra medrou un 16%, segundo o INE. Ademais, a contía media destes créditos experimentou unha suba moi notable, incrementándose nun 34% ata chegar case aos 68.000 euros por operación. O escenario está favorecido pola recente baixada dos tipos de xuro decidida polo Banco Central Europeo, o que facilita o acceso a financiamento e alimenta un ciclo de crecemento inmobiliario que esperta recordos da etapa previa á burbulla.

Fonte.- Atlántico