O prezo da vivenda usada en España acadou en agosto un novo máximo histórico, segundo os datos do portal idealista. O metro cadrado situouse en 2.498 euros, o que supón unha suba do 14,8% respecto ao mesmo mes do ano pasado. Ademais, nos últimos tres meses o incremento foi do 4,5% e, fronte a xullo, do 1,1%. Todas as comunidades autónomas rexistraron aumentos interanuais, con Madrid á cabeza (23,3%), seguida por Murcia, Cantabria, Comunitat Valenciana, Andalucía e Canarias. Pola contra, Cataluña, Euskadi, Baleares e Asturias presentaron evolucións por debaixo da media estatal.

As menores variacións déronse en territorios como Extremadura, Navarra, La Rioja, Galicia, Castela e León, Aragón e Castela-A Mancha, con subas inferiores ao 5%. No ránking de prezos medios por autonomía, Baleares mantense como a máis cara, con 5.068 euros/m², seguida pola Comunidade de Madrid (4.384 euros/m²), Euskadi, Canarias e Cataluña. Nos niveis máis baixos atópanse Castela-A Mancha (986 euros/m²), Extremadura (989 euros/m²) e Castela e León (1.244 euros/m²). A nivel provincial, Madrid rexistrou o maior aumento interanual (23,3%), mentres que sete provincias, entre elas Ourense (-5,4%) e Teruel (-1,5%), viron como os prezos caían.

En canto ás cidades, 51 capitais experimentaron incrementos no último ano, con Santa Cruz de Tenerife liderando o crecemento (22,9%). Outros fortes aumentos déronse en Madrid, Guadalajara, Valencia, Santander, Teruel e Palma. Pola contra, Girona foi a única capital que baixou (-4,8%), e Soria, Ourense ou Badaxoz tiveron subas moi moderadas. Entre os grandes mercados, destacou o comportamento de Madrid (5.723 €/m²) e Barcelona (4.991 €/m²), mentres San Sebastián se consolidou como a capital máis cara do Estado con 6.283 €/m². Pola parte baixa, Zamora (1.239 €/m²), Jaén (1.300 €/m²) e Cidade Real (1.395 €/m²) foron as capitais máis accesibles para mercar vivenda usada.

Fonte.- Idealista