O mercado inmobiliario español rexistrou 164.148 compravendas de vivenda no terceiro trimestre de 2026, un 2,3% menos que no trimestre anterior e un 5,9% por baixo do mesmo período do ano precedente. Trátase do terceiro descenso trimestral consecutivo e do menor volume de operacións dos últimos nove trimestres. A vivenda nova contabilizou 34.611 transaccións, cunha caída do 0,9%, mentres que a usada sumou 129.537, un 2,6% menos. En contraste, o prezo medio alcanzou os 2.512 euros por metro cadrado, un máximo histórico tras aumentar un 1% trimestral e un 9,3% interanual. A Comunidade de Madrid encabezou os prezos autonómicos, con 4.565 euros/m², seguida de Baleares, con 4.502 euros/m², e do País Vasco, con 3.693 euros/m².

A demanda estranxeira representou o 16,05% das compravendas, a maior proporción da serie histórica, cun volume superior ás 26.300 operacións. Baleares concentrou a maior participación de compradores internacionais, co 37,2%, seguida da Comunidade Valenciana, co 30,4%. Pola súa banda, as hipotecas sobre vivenda descenderon un 3,9%, ata as 124.145 operacións, aínda que o balance dos últimos doce meses alcanzou as 519.388, un 6% máis. O endebedamento hipotecario medio por vivenda situouse en 179.466 euros, un novo máximo histórico tras encadear dez trimestres de incrementos. Ademais, a débeda media por metro cadrado ascendeu a 1.900 euros, cun crecemento trimestral do 2,1%, segundo a Estatística Rexistral Inmobiliaria do Colexio de Rexistradores.

Fonte.- Info construcción