O Goberno aprobou dous reais decretos como primeira resposta ás consecuencias económicas derivadas do conflito en Oriente Próximo, cun paquete global de medidas valorado en arredor de 5.000 millóns de euros, centrado principalmente en rebaixas fiscais no ámbito enerxético. No eido da vivenda, a normativa introduce mecanismos específicos para o mercado do alugueiro, co obxectivo de conter o impacto da inflación e da tensión nos prezos. Entre as principais medidas destacan a limitación das actualizacións anuais das rendas ao 2% e a posibilidade de prorrogar contratos próximos ao seu vencemento, nun contexto no que o custo da vivenda e dos subministros supera xa o 30% dos ingresos en moitos fogares.

A norma establece que os contratos de alugueiro de vivenda habitual que finalicen antes do 31 de decembro de 2027 poderán ampliarse ata dous anos adicionais mantendo as condicións vixentes, salvo excepcións legais. Ademais, fixa un límite extraordinario do 2% ás revisións anuais das rendas ata esa mesma data, especialmente estrito no caso de grandes propietarios con máis de 10 inmobles. Estas medidas buscan evitar incrementos significativos asociados ao IPC, que noutros escenarios chegou a situarse preto do 10%, e responden tamén á falta de aplicación de zonas tensionadas en distintas comunidades autónomas, o que impide activar outros mecanismos de control previstos na lexislación vixente.

Fonte.- El Pais