O Goberno vén de publicar no Boletín Oficial do Estado dous decretos que recollen 21 medidas relacionadas coa vivenda e manteñen a estrutura das propostas rexeitadas polo Congreso, aínda que incorporan algunhas modificacións. Entre as iniciativas figuran a ampliación ata 2030 da protección fronte aos desafiuzamentos para persoas vulnerables sen alternativa habitacional, préstamos sen xuros de ata 50.000 euros para a compra da primeira vivenda e a prórroga durante dous anos dos contratos de alugueiro que rematen antes de finais de 2028. Tamén se establece un límite xeral do 2 % para as actualizacións das rendas ata finais de 2027, ademais de medidas para regular os alugueiros de tempada e por habitacións.

O paquete inclúe incentivos fiscais para propietarios que reduzan os prezos dos alugueiros, unha dedución do 10 % das cantidades destinadas á vivenda habitual para inquilinos cunha base impoñible inferior a 33.307 euros e a aplicación dun IVE do 10 % aos alugueiros turísticos. Os concellos poderán establecer recargas de ata o 150 % no imposto sobre bens inmobles (IBI) para vivendas baleiras durante máis de tres anos e inmobles turísticos. Ademais, o Executivo prevé destinar 280 millóns de euros en avais para impulsar a construción industrializada de vivendas e 2.000 millóns de euros en financiamento para promover inmobles destinados ao alugueiro social ou alcanzable. As medidas tamén contemplan restricións ás compras especulativas de determinados fondos e o traslado de vivendas da Seguridade Social ao parque público de alugueiro alcanzable.

Fonte.- Onda Cero