O Goberno de Corea do Sur presentou unha reforma fiscal orientada a reducir a presión sobre o mercado da vivenda mediante o incremento de ata 2,3 puntos porcentuais do imposto anual aplicado ás vivendas de maior valor e un endurecemento da tributación para os propietarios con varios inmobles. Ao mesmo tempo, prevé aliviar a carga fiscal dos propietarios dunha única vivenda destinada a residencia habitual co obxectivo de reducir a demanda especulativa, favorecer o acceso á primeira vivenda e aumentar a dispoñibilidade de inmobles no mercado.

Actualmente, o prezo medio dos apartamentos en Seúl sitúase arredor de 1.250 millóns de wones, equivalentes a uns 850.000 dólares, e vén de alcanzar trece meses consecutivos de incrementos. Ademais das medidas tributarias, o Executivo endureceu tamén as condicións de acceso ao crédito hipotecario e limitou o financiamento para a compra de vivenda na área metropolitana de Seúl. O Ministerio de Finanzas estima que a reforma permitirá obter ingresos adicionais de 3,44 billóns de wones (aproximadamente 2.400 millóns de dólares) ao longo dos próximos cinco anos, dos que 2,18 billóns procederán do incremento do imposto sobre a propiedade inmobiliaria.

Fonte.- El Economista