O decreto de vivenda establece medidas para ampliar a oferta de vivenda accesible e reforzar a protección dos fogares vulnerables. Entre as disposicións figura a limitación dos procedementos de desafiuzamento ata o 31 de decembro de 2030 cando non exista unha alternativa habitacional, así como unha prórroga extraordinaria de ata dous anos para determinados contratos de alugueiro. As actualizacións das rendas quedarán limitadas ata finais de 2027: cando non exista un novo acordo entre as partes, o incremento non poderá superar o 2% e, nos casos nos que a renda exceda o límite establecido polo sistema de referencia, non se poderá aplicar ningunha subida. O texto tamén regula os alugueiros de tempada e por habitacións e introduce deducións fiscais para inquilinos e propietarios.

A norma incorpora medidas para facilitar o acceso á primeira vivenda, entre elas o programa 'Tu Casa', que poderá financiar ata o 20% do valor do inmoble, cun máximo de 50.000 euros, mediante préstamos a tipo cero e sen comisións. Tamén blinda con carácter permanente o parque estatal de vivenda accesible e protexida, establece un IVE do 4% para determinadas vivendas protexidas de nova construción e modifica a fiscalidade das Socimi, elevando do 15% ao 25% o gravame sobre os beneficios procedentes do alugueiro residencial. Ademais, permite recargos de ata o 150% no IBI para determinadas vivendas baleiras e crea avais de ata 2.000 millóns de euros para proxectos de alugueiro social ou accesible, xunto con outros 280 millóns para impulsar a construción industrializada.

Fonte.- Europa Press