Os prezos da vivenda en España continuarán rexistrando incrementos superiores ao 10% anual durante 2026 e non amosarán sinais de moderación ata 2027, segundo un informe elaborado por Oxford Economics. A consultora atribúe esta evolución á persistencia dun desequilibrio entre oferta e demanda, cun déficit acumulado de arredor de 800.000 fogares máis creados que vivendas construídas desde 2021. Entre os factores que sosteñen os prezos destacan os baixos tipos de interese, o crecemento demográfico vinculado á inmigración e a evolución do emprego, aínda que o estudo anticipa unha progresiva perda de intensidade destes elementos, o que favorecería unha desaceleración das subas sen chegar a provocar descensos nos prezos.

O informe tamén sinala que o acceso á vivenda segue deteriorándose, especialmente nas zonas con maior presión da demanda, onde o esforzo económico das familias é máis elevado. Oxford Economics considera que a eliminación da ‘golden visa’ podería contribuír a moderar os prezos nalgunhas áreas concretas con forte presenza de capital internacional. A pesar do encarecemento continuado, a consultora descarta un risco de burbulla inmobiliaria ao considerar que non existe un sobreendebedamento das familias. As compravendas alcanzan niveis similares aos previos á crise inmobiliaria, pero os préstamos hipotecarios representan aproximadamente a metade, mentres que arredor do 30% das adquisicións se realizan sen financiamento hipotecario. Ademais, a morosidade dos préstamos para vivenda reduciuse do 6% en 2014 ao 1,8%.

Fonte.- elDiario