A oferta de vivenda en alugueiro de longa duración reduciuse un 19 % tras a aprobación dos reais decretos de vivenda, coa desaparición de 26.531 anuncios nun mes, segundo os datos publicados por Idealista. Esta diminución súmase á tendencia descendente que acumula o mercado, cunha caída superior ao 60 % desde 2020. Entre as capitais con maiores retrocesos destacan Teruel, cunha baixada do 46 %; Soria, do 37 %; Burgos, do 36 %; Cuenca, do 34 %; Huesca, do 32 %, e Xaén, do 31 %. Entre as principais cidades, Madrid e Valencia rexistran descensos do 27 %, mentres que A Coruña, Barcelona e Zaragoza presentan unha redución do 25 %. Sevilla alcanza o 23 %, Bilbao o 21 % e Málaga o 11 %. Ceuta é a única capital na que aumenta a oferta, cun 6 %.

O descenso é especialmente acusado nalgunhas cidades afectadas polas limitacións de prezos. En Euskadi, a oferta diminúe un 27 % en Vitoria, un 24 % en Donostia e un 21 % en Bilbao; Pamplona rexistra unha caída do 30 %, mentres que A Coruña alcanza o 25 %. En Cataluña, a redución sitúase no 29 % en Lleida, no 25 % en Barcelona e no 24 % en Girona. Os datos coinciden coa aplicación de medidas que inclúen prórrogas dos contratos de arrendamento, límites á actualización das rendas, protección fronte aos desafiuzamentos e indemnizacións por finalización anticipada dos contratos. Segundo Idealista, este contexto regulatorio podería estar influíndo nas decisións dos propietarios, que optan por retirar os inmobles do mercado, agardar a posibles cambios normativos ou destinalos á venda.

Fonte.- La Expansión