As previsións de Unión de Créditos Inmobiliarios (UCI) e 'Spanish International Realty Alliance' (SIRA) indican que os prezos da vivenda, tanto en venda como en alugueiro, seguirán subindo nos próximos meses. Segundo a última edición do seu Barómetro Inmobiliario, espérase que o custo da compravenda aumente un 10% ao longo de 2025, mentres que o alugueiro experimentará un incremento do 8,6%. Porén, este crecemento variará segundo a rexión, destacando Murcia cunha subida do 15% e a Comunidade Valenciana cun 12,4%, seguidas de Galicia, Andalucía e Cataluña cun 10%. Pola contra, os incrementos máis moderados prevéñse en Extremadura (2,5%), Aragón (4,2%) e Castela e León (4,6%). O informe tamén estima que o número de compravendas crecerá un 4,6%, acadando preto de 750.000 operacións en 2025, mentres que o mercado do alugueiro sufrirá un descenso do 7,3% no volume de transaccións, debido á escaseza de vivendas dispoñibles.

A análise do sector inmobiliario sinala a falta de oferta de vivenda como o principal reto para 2025, tanto en venda como en alugueiro, seguida da necesidade de reforzar a seguridade xurídica dos propietarios e fomentar a construción de vivenda accesible en áreas con alta demanda. Ademais, destacan a importancia de facilitar o acceso ao financiamento para compradores de primeira vivenda e impulsar a rehabilitación con axudas públicas. Segundo o subdirector xeral de UCI, José Manuel Fernández, será clave a colaboración entre o sector público e privado para atopar solucións que melloren a oferta sen desincentivar o investimento. Fernández subliña que as decisións políticas que se tomen nos vindeiros meses terán un papel determinante na evolución do mercado e no acceso á vivenda.

Fonte.- Idealista