O Ministerio de Vivenda e Axenda Urbana vén de declarar Santiago de Compostela como zona de mercado residencial tensionado, unha medida que terá unha vixencia inicial de tres anos e que sitúa a cidade xunto á Coruña como os dous municipios galegos con esta consideración. A declaración permitirá aplicar mecanismos de contención dos prezos do alugueiro, incentivos fiscais no IRPF para determinados arrendamentos e un maior acceso ás axudas do Plan Estatal de Vivenda. Ademais, os novos contratos de alugueiro deberán tomar como referencia o importe do contrato anterior e os índices oficiais do Sistema Estatal de Referencia de Prezos do Alugueiro (SERPAVI), co obxectivo de evitar incrementos excesivos nas rendas.

A declaración eleva a 317 o número de municipios considerados zonas de mercado residencial tensionado en España, cunha poboación afectada de 9,3 millóns de persoas. A normativa tamén obriga ás administracións públicas a desenvolver, nun prazo de tres anos, medidas destinadas a incrementar a oferta de vivenda en alugueiro. Mentres o Concello de Santiago valora a medida como unha ferramenta para mellorar o acceso á vivenda e impulsar a rehabilitación do parque residencial, a Xunta de Galicia mantén o seu rexeitamento ao considerar que este modelo pode reducir a oferta de vivendas en alugueiro e defende como alternativa o incremento da construción de vivenda protexida.

Fonte.- G24