Durante o mes de decembro vendéronse 683.000 vivendas de nova construción nos Estados Unidos, consolidando así o 2024 como o segundo ano consecutivo de crecemento no mercado inmobiliario de obra nova, segundo datos do Departamento de Comercio do país. En comparación co mesmo mes do ano anterior, cando se transaccionaron 666.000 vivendas, rexistrouse un incremento interanual do 2,5%, confirmando a tendencia á alza no sector. En decembro de 2022, as vendas foron de 641.000 unidades, o que evidencia un crecemento sostido nos últimos anos.

Historicamente, o pico máximo de vendas de obra nova produciuse en decembro de 2005, cando se alcanzaron preto de 1,3 millóns de operacións. Con todo, a partir dese momento as cifras caeron ata tocar fondo en 2011, cun mínimo de 306.000 vivendas vendidas. Posteriormente, o mercado experimentou unha recuperación progresiva ata 2020, cando, a pesar da pandemia, acadou 822.000 vendas en decembro, un rexistro que non se volveu superar. No último mes de 2024, o prezo medio das novas vivendas situouse en 427.000 dólares, un 2,1% máis respecto ao ano anterior.

Segundo expertos da axencia financeira Bloomberg, este crecemento nas compras de obra nova débese principalmente á escaseza de vivenda existente e ás facilidades que ofrecen as promotoras para atraer compradores. Aínda que se prevé que a demanda continúe en ascenso en 2025, os analistas móstranse prudentes ante posibles obstáculos, como o encarecemento das hipotecas, o aumento dos prezos ou as políticas que poida implementar Donald Trump no ámbito da vivenda.

Fonte.- Idealista