Un estudo realizado pola entidade financeira Aldermore revela que o 31% dos propietarios de vivendas no Reino Unido está considerando deixar de alugar e poñer á venda as súas propiedades. Esta decisión vén motivada, principalmente, polo aumento da carga impositiva e pola futura Lei de Dereitos dos Inquilinos que prepara o goberno británico, a cal busca limitar os prezos do alugueiro, prohibir os desaloxos e eliminar os coñecidos como “desaloxos sen culpa”, que permitían finalizar un contrato cun aviso de dous meses sen necesidade de xustificación. Ademais, os elevados custos de mantemento tamén xogan un papel determinante nesta tendencia.

O informe tamén pon o foco no chamado “imposto do selo”, similar ao imposto sobre actos xurídicos documentados en España, que afecta ás propiedades adquiridas para ser alugadas. Dende o 1 de abril, o límite exento deste imposto para compradores de primeira vivenda reduciuse de 425.000 libras a 300.000, o que está a provocar un descenso na demanda. 

A entidade financeira advirte de que esta situación podería derivar nunha crise de oferta no mercado do alugueiro, xa que a retirada de vivendas provocaría un aumento dos prezos e da competencia entre inquilinos. O estudo tamén recolle que a metade dos arrendadores perciben un incremento do interese por parte de posibles inquilinos. Pola súa parte, moitas persoas en alugueiro manifestan temor a ter que volver compartir vivenda ou regresar á casa familiar, debido á suba dos prezos e á redución da dispoñibilidade. O 69% considera que esta dinámica podería deteriorar a calidade das vivendas dispoñibles.

Fonte.- Idealista